மலை போன்ற துக்கத்தை மெளனமாகத் தாங்கி நிற்கும் சிறிய கண்ணீர்த் துளியைப் போல, ஒரு மிகப்பெரிய வலியைச் சுமந்து நிற்கின்ற ஒரு தலைமுறை இளைஞர்களின் சோகத்தையும் மதமோதல்களால் குண்டு வெடிப்புகளால் உயிரிழந்த, வாழவிழந்த அப்பாவி மக்களின் துயரத்தையும் மதச்சார்பற்ற சமூகத்தின் மனசாட்சியின் முன்பு வைக்கவே விரும்புகிறேன் என்று இந்த நாவலின் மூலம் நமக்க எடுத்துரைக்கிறார்.
ஒருநாள் கோபத்தில் தற்செயலான மோதலில் ஏற்பட்டதல்ல இந்தக் கலவரமும் குண்டு வெடிப்பும்.
மௌனத்தின் சாட்சியங்கள் சம்பவங்களை உணர்வுப்பூர்வமாகப் பார்ப்பதோடு நில்லாமல் தவிர்க்க முடியாத விதத்தில் கலவரங்களுக்கும் குண்டு வெடிப்புக்கும் கொண்டு போய்விட்ட பின்னணியை நேர்மையுடன் அலசுகிறது, பதிவு செய்கிறது.
ஒரு கழுகுப் பார்வையாக சம்பவங்களின் கோர்வையை நம்முன் வைக்கிறது. அந்த விதத்தில் இந்த நாவல் ஒரு நம்பகமான ஆவணமாகவும் இருக்கிறது.
குண்டு வெடிப்புக்குப் பலகாலம் முன்பே இஸ்லாமியர் வாழும் பகுதிகள் திறந்தவெளிச் சிறைகளாக மாற்றப்பட்டதையும், அதன் காரணமாக தீவிரம் பெற்ற இயக்கங்களையும் துல்லியமாக நம் முன்வைக்கும் அதேநேரத்தில் குண்டு வெடிப்பால் கூட்டம் கூட்டமாகக் கொல்லப்பட்ட அப்பாவி இந்துக்கள் பற்றியும் விரிவாகப் பேசுகிறது மௌனத்தின் சாட்சியங்கள்.
