நத்தம் எஸ்.சுரேஷ்பாபு
அலட்சியம்-
இது நம் வாழ்க்கையில் ஒன்றாகிப் போய்விட்டது. நாம் எதையுமே லட்சியப்படுத்துவது இல்லை. எதையெடுத்தாலும் நமக்கு அலட்சியம்தான். வெற்றி பெற்றவர்களின் வாழ்க்கையை கூர்ந்து நோக்கினோமேயானால் அவர்கள் எதையும் அலட்சியப்படுத்தி இருக்க மாட்டார்கள் என்பதை நம்மால் அறிந்து கொள்ள முடியும்.
அலட்சியம் எதனால் வருகிறது?
சோம்பல் மற்றும் ஆர்வமின்மையால்தான் அலட்சியம் வருகிறது.
அலட்சியத்தால் வாழ்க்கை இழந்தவர்களும் வாய்ப்பு இழந்தவர்களும் ஏராளம். ஆனாலும் நாம் இன்னும் அலட்சியத்தை கைவிடவில்லை என்பதுதானே உண்மை. எதுவென்றாலும் நமக்கு அலட்சியம்தான். குண்டுசி குத்தினாலும் அலட்சியம் கூடங்குளம் அணு உலையானாலும் அலட்சியம். பத்து ரூபாய் லஞ்சம் என்றாலும் அலட்சியம் பல்லாயிரக்கணக்கான கோடி ஊழல் என்றாலும் அலட்சியம். ஒரு நான்கு நாளைக்கு அதைப்பற்றி பேசிவிட்டு அப்புறம் மறந்து விடுகிறோம். அதாவது அலட்சியமாக விட்டு விடுகிறோம். மறுபடியும் அதே ஊழல் வாதிகளை கொண்டாடி நாட்டை அவர்களிடம் கொடுக்கிறோம்.
இதில் ஒரு நொண்டி சாக்கு வேறு. தேன் எடுக்கிறவன் புறங்கையை நக்காம இருப்பானா..? என்று நமக்கு நாமே சமாதானம் தேடிக் கொள்கிறோம். காலையில் எழுவதிலிருந்து மாலை உறங்கும் வரை தினம் தினம் நாம் எல்லாவற்றிலும் அலட்சியமாகத்தான் இருக்கிறோம்.
காலையில் ஏழு மணிக்கு ஆபீஸ் கிளம்ப வேண்டும் என்றால் ஐந்து மணிக்கு எழுந்தால் நன்றாக இருக்கும். மறக்காமல் அலாரம் வைத்து எழுந்து கொள்ள வேண்டும் என்று நினைப்போம். அந்நினைவோடு படுத்து விடுவோம். எழுந்து மீண்டும் அலைபேசியில் அலாரம் வைக்க சோம்பேறித்தனம். இருக்கட்டும் பார்த்துக்கலாம் ஒரு நாள் லேட்டா போனா ஒண்ணும் குறைஞ்சி போயிடாது என நம்மை நாமே சமாதானப்படுத்திக் கொள்வதிலும் ஒரு அலட்சியம் இருக்கத்தானே செய்கிறது.
பள்ளிப் பேருந்தில் இருந்த ஒரு ஓட்டையை அலட்சியப்படுத்தியதால்தான் பாவம் ஒரு அப்பாவி சிறுமி பலியானாள். நம்முடைய அலட்சியம் வாக்களிப்பதில் கூட இருக்கிறது. ஒரு நாள் கிடைக்கிற லீவுல ஜாலியா இருக்காம எவன் போய் கியுவில காத்து கால் கடுக்க நின்னு ஓட்டு போட்டுகிட்டு என்ற அலட்சியம். அதுபோக நாம போடுற ஒரு ஓட்டுல உலகமே மாறிடப் போகுதாக்கும் என்று எண்ணி போகாமல் இருந்து விடுகிறோம். இது எவ்வளவு பெரிய அலட்சியம், ஜனநாயகத்தில் ஓட்டளிப்பது நமது கடமை, இதை கூடச் செய்யாமல் அலட்சியப்படுத்தி விடுகிறோம்.
இதைப்போல நம்முடைய அன்றாட வாழ்வில் பல அலட்சியங்களை கண்கூடாகப் பார்க்கிறோம், நாமும் அதைச் செய்கிறோம். மின் தட்டுப்பாடு நிலவும் இக்காலத்தில் பகலில் கூட விளக்குகள் ஒளிர்கின்றது. குழாயில் தண்ணீர் வீணாகிறது. சாலையில் வாழைப்பழத்தோலை அலட்சியமாக வீசுவதும், பூசணிக்காய்களை உடைத்து சாலையில் போடுவதும் இப்போதும் தொடரத்தான் செய்கிறது.
இதெல்லாம் ஒருபுறம் இருக்க, தலைக்கவசத்தின் முக்கியத்துவத்தைப் பற்றித் தெரிந்திருந்தும் அதை அணியாமல் அலட்சிமாகப் பயணிப்பதால்தானே எண்ணற்ற விபத்துக்களில் உயிரிழப்புக்கள் ஏற்படுகிறது.
கட்டணங்கள் கட்ட வேண்டிய தேதி வரை கட்டாமல் கடைசி நாள் பாத்துக்கலாம் என்று தள்ளிப்போடுவது. வண்டியில் சிறிது காற்று குறைவாக இருக்கும் போதே கவனிக்காமல் விட்டு சுத்தமாக பஞ்சர் ஆகி நிற்கும் போது எரிச்சல் அடைவது என்று நாம் அலட்சியப்படுத்தும் விசயங்கள் ஏராளம்.
சின்ன வயதில் படித்த ஒரு பாட்டு,அதன் அர்த்தம் மட்டும் சொல்கிறேன். பாடல் மறந்து விட்டது.
குதிரை வீரன் ஒருவன் அண்டை நாட்டுக்காரன் படையெடுத்து வருகிறான் என்று தன் நாட்டிற்கு செய்தி சொல்லப் புறப்படுவான். வழியில் குதிரையின் லாடத்தில் ஒரு ஆணி கழன்று விடும். ஒரு ஆணி தானே! பார்த்து கொள்ளலாம் என்று அலட்சியப்படுத்தி பயணிப்பான் அவன். ஒரு ஆணி போனதால் லூஸான லாடம் கழன்று கொள்ளும். லாடம் கழன்றதால் குதிரையால் வேகமாக பயணிக்க முடியாமல் போகும். மேலும் கால் புண்ணாகி பயணம் தடைபடும். இதற்குள் அண்டை நாட்டுகாரன் படையெடுத்து வந்து அந்த நாடே அடிமைப் பட்டு போகும். ஒரு ஆணியை அலட்சியப்படுத்தியதால் வந்த வினை இது.
நாமும் அப்படித்தான்… வியாபாரத்திற்குத்தானே வந்தார்கள் என்று அலட்சியப் படுத்தியதால் முன்னூறு ஆண்டுகள் அடிமைப்பட்டு கிடந்தோம் அந்நியரிடத்தில்.
பெரிய பெரிய கோயில்கள் பாழடைந்து கிடக்கும் அல்லது அந்த கோயில் தளங்களில் பெரும் ஆல, அரசமரங்கள் முளைத்து இடிந்து கிடக்கும். இதை நீங்களும் கூடக் கண்கூடாகப் பார்த்திருப்பீர்கள். ஒரு பெரிய கட்டிடத்தையே அந்த மரத்தின் வேர்கள் சாய்த்திருப்பதைக் கண்டிருப்பீர்கள். இது அலட்சியத்தால் நேர்ந்தது அன்றோ..! சிறு செடியாக இருக்கும் போதே களைந்து இருந்தால் அந்த கட்டிடங்கள் பாழாகி இருக்காது அல்லவா? ஆனால் கவனிக்காமல் விட்டதாலோ அல்லது சிறு செடிதானே என்று எண்ணியதாலோ ஏற்பட்ட நிகழ்வுதானே இது. இதனால் கட்டிடமே குலைந்து போகின்றது அல்லவா?
வெற்றி பெற விரும்புபவர்கள் எதையும் அலட்சியப்படுத்த மாட்டார்கள்.
சிறு துரும்பும் பல் குத்த உதவும் என்று பழமொழியே உண்டு. நாமும் வெற்றியாளர்களாக மாற அலட்சியத்தை அலட்சியப்படுத்துவோம்..! வெற்றி பெறுவோம்…!!
